Viadi da Confirmands 2026, Sent e Valsot a Montmirail
Dürant la prüm’eivna da las vacanzas d'utuon ha lö adüna il viadi dals confirmands da las raspadas da Valsot e Sent. Üna confirmanda e ses confirmands sun partits insembel culs manaders sün ün lung viadi. Il böt: Montmirail situà al cunfin da la Svizra francesa. Ma laschain tantüna quintar ils giuvens güsta svess:
Partits eschna in sonda, 10 october 2026. Il prüm stop vaina fat a Turich. Là eschna its a visitar l’università. Mangià giantar vaina in üna granda halla. Eir vaina durmi sün üna bella cuotscha. Davo vaina observà las baselgias da la cità. Lura eschna its cul tren fin Ins. Quist es il lö da naschentscha da rav. Peter Schwab. E da là vaina cuntinuà nos viadi cul bus fin a Marin-Epagnier. Cur cha nus eschan rivats a Montmirail, ans ha Matthias invidats a far ün gö per far cugnuoschentscha cul lö e sia comunità. Davo tschaina vaina exercità duos chanzuns pel cult divin da dumengia. Cun ün gö vaina imprais bler davart l'istorgia da la refuorma in Svizra.
Dumengia a bunura daiva tarschoula cun sü e meil. Tenor Juri üna buntà. No eschan its a predgia. Il ravarenda dalla comunità «Don Camillo» ha illustrà l'istorgia da la guarischun al puoz da Bethesta cun caricaturas impreschiunantas. Davo eschna its a Neuchâtel. Ün bun picnic a la riva dal lai ed ün quiz da fotografias sun stats là sül program. Davo eschna tuornats culla barcha. La saira vaina giovà gös insembel. Ant co ir a cuz restaiva amo ün pa temp per üna runda vi da la maisa da pingpong.
Lündeschdi bunura cumanzaiva il di cun üna uraziun. No d’eiran indrumanzats. I ha però deliberà ün zich il cheu. A no plascha il viadi fich bain fin uossa. Eschan buondrius che chi’ns spetta amo.
Ils giuvenils han scrit quist rapport dürant il temp da spettar a la staziun da Neuchâtel. Davo seguiva il punct culminant dal viadi. Cul tren eschna its tras la Val de Travers a Noiraigue. Là vaina tut suot ils peis la senda stipa vers il Creux du Van. La fadia ha valü la paina: Süsom s’ha preschantà ün spectacul da natüra impreschiunant. Marenda vaina pudü far cun üna vista da bellezza. Güsta partits per ir aval, vaina pudü observar quatter capricorns da dastrusch.
Ils manaders: Seraina Guler, rav. Christoph Reutlinger e rav. Peter Schwab
