Cult divin e tagliar il chaschöl aint in Alp Prà San Flurin in dumengia als 26 lügl 2026
Festa da tradiziun aint in Alp Prà San Flurin:
tagliar chaschöl, brunch e cult divin.
Mincha stà ha lö in Alp Prà San Flurin dadaint Sent la festa tradiziunala, ingio chi vain taglià ed insajà il prüm chaschöl d’alp. Daspö ons collià cun ün cult divin da muntogna ed ün püschain cumünaivel.
Ün pa skeptica as vezzaiva schon illas fatschas dals giasts, chi’s vaivan radunats a bunura in Plaz a Sent. Plövgia e temperaturas plü fraidas gnivan spettadas fingià lönch cun brama. Cha quai es capità precis la dumengia da la festa, es statta üna pitschna dischillusiun per giasts ed organisatuors. Tuottüna s’han tuots as laschats manaschar sün vias champestras, per part aventürusas aint vers l'Alp Prà San Flurin.
Rivats là esa subit gnü cler cha las pauras e'ls paurs sco eir ils impiegats da la chascharia Sent e da l'alp han pisserà cun lur talent d'organisaziun, cha la festa possa gnir manada tras bain illa stalla da l’alp.
Davo il bivgnaint dal president da la società d'alp e chascharia il prüm punct culminant: Sün ün'assa da lain es gnü preschantà il prüm chaschöl prodot, decorà cun fluors da muntogna ed ulteriurs prodots frais-chs. Plain tensiun es gnü fat il prüm tagl tras il chaschöl gelg d'or. Subit ha üna savur agreabla da chaschöl da muntogna frais-ch impli l’ambiaint.
Prümas prouvas sun gnüdas dattas intuorn e degustadas da persunas dal fat. Cuntantezza süllas vistas dals probands, ün ferm viva sün ulteriur bun andamaint da la stà d'alp e fingià s'haja pudü drivir il büfè da brunch.
Davo il bainstar corporal gniva a la fin eir pisserà pel bainstar spiertal. Chi sarà il nouv ravarenda chi'd es gnü a star cun sia duonna avant bundant ün mais illa chasa pravenda a Sent? Il president da la corporaziun d'alp ed eir ulteriurs giasts preschaints vaivan fingià fat cugnuschentscha cun el in cumün. In ün möd simpel ed inclegiantaivel ha el cumanzà il cult divin culs pleds cugnuschüts dal psalm 121: “Eu oz meis ögls vers ils munts ; d’ingionder am vain agüd? Agüd am vain dal Segner chi ha creà il tschêl e la terra.”
Quist pled biblic es in seguit gnü collià cun experienzas da minchadi ed illustrà cun exaimpels. Qua ha il ravarenda cità il pled cuntschaint da Martin Luther: “I's sto urar sco scha tuot lavurar nu güdess nöglia, ed i's sto lavurar sco scha tuot urar nu güdess nöglia.” Natüralmaing cha'l cuntschaint coral “Il bun pastur” nun ha pudü mancar.
Musicalmaing es il cult divin gnü inromà d'üna pitschna fuormaziun da la Società da musica Sent. Ils clings da la musica d'instrumaints han dat a l'occurrenza amo üna dignità tuot speciala.
Sco punct sül « i » han ils organisatuors servi meringue gustus cun latmilch sco dessert. Barat d'ideas da cumpagnia e prüms tocs chaschöl, ils quals han chattà nouvs possessurs han arrundi l'evenimaint. E sco scha l'ora as vuless eir amo muossar da sia megldra vart, as s-chamütschaivan alchüns razs da sulai tmüchs tras las nüvlas chi's schloccaivan.
